२५ पौष, काठमाडौं । बुटवलमा जारी मदन भण्डारी गोल्डकप इन्डो-नेपाल रनिङ शिल्ड पुरुष भलिबल च्याम्पियनसिपको उपाधि त्रिभुवन आर्मी क्लबले जितेको छ ।

अर्को विभागीय टिम नेपाल पुलिस क्लबलाई आज भएको फाइनल खेलमा ३-२ को सेटमा पराजित गर्दै आर्मीले उपाधि चुमेको हो । आर्मीले जीतसँगै नगद ७ लाख रूपैयाँ, शिल्ड र ट्रफी प्राप्त गरेको छ । प्रतियोगितामा नेपाल पुलिस क्लबले पहिलो रनरअपमा चित्त बुझायो । पुलिसले ३ लाख ५० हजार रूपैयाँ नगदसहित शिल्ड प्राप्त गरेको छ । प्रतियोगितामा मणिमुकुन्द भलिबल क्लब तृतीय भएको छ । भारतीय गुजरात स्टेट भलिबल क्लबले डिफल्ट गरेपछि मणिमुकुन्द तृतीय स्थान पाएको हो । तृतीय भएसँगै मणिमुकुन्दले एक लाख ७५ हजार रूपैयाँ नगद र मेडल प्राप्त गरेको छ । यसैगरी, प्रतियोगितामा भारतीय गुजरात स्टेट भलिबल क्लबले एक लाख रूपैयाँ नगदसहितको सान्त्वना पुरस्कार प्राप्त गरेको छ ।

मदन भण्डारी स्पोट्र्स एकेडेमीले आफ्नो १६ औं स्थापना दिवसको अवसर पारेर मदन भण्डारी गोल्डकप इन्डो-नेपाल रनिङ शिल्ड पुरुष भलिबल च्याम्पियनसिप आयोजना गरेको थियो । पुस १७ गतेदेखि शुरू भएको प्रतियोगितामा भारतसहित ८ टिम सहभागी थिए ।