२९ पुस, काठमाडौं । ट्याङ्करको ठक्करबाट मोटरसाइकलमा सवार दुई जनाको मृत्यु भएको छ ।

मृत्यु हुनेमा कैलाली जिल्लाको धनगढी उपमहानगरपालिका-३ का अन्दाजी ४८ वर्षीय घमणबहादुर शाही र धनगढी–१४ का अन्दाजी ३६ वर्षीय रूपेश बस्नेत रहेका छन् । 

पूर्व पश्चिम राजमार्ग अन्तर्गत बाँकेको राप्ती सोनारी गाउँपालिका-१ कुसुम नजिक ना ८ ख ३३३ नम्बरको तेल बोकेर दाङतर्फ आउँदै गरेको ट्याङ्करले दाङबाट पश्चिम कोहलपुरतर्फ जाँदै गरेको भे ९ प ९५१७ नम्बरको मोटरसाइकललाई ठक्कर दिएको हो।

सोमबार मध्याह्न १२ बजेर ६ मिनेटमा घटना भएको प्रहरीले जनाएको छ । अस्पताल पुर्‍याउना साथ सुरूमा शाहीलाई कोहलपुर मेडिकल कलेजका चिकित्सकले मृत घोषणा गरेको प्रहरीले जनाएको छ ।