०३ माघ, काठमाडौं । इजरायली प्रधानमन्त्री बेन्जामिन नेतन्याहूको कार्यालयले गाजामा हमास र इजरायलबिचको युद्धविराम सम्झौतालाई मन्जुरी दिन अस्वीकार गरेको छ ।

हमासले अन्तिम क्षणको सङ्कटबाट पछि नहटेसम्म गाजा युद्ध विराम सम्झौता अनुमोदन गर्न मन्त्रिपरिषद्को बैठक नबस्ने उनले आज बताएका हुन् । अन्तिम समयमा छुटहरू प्राप्त गर्ने प्रयासमा सम्झौताका केही अंशहरूबाट पछि हटेको आरोप नेतन्याहूको कार्यालयले हमासलाई लगाएको छ । इजरायली मन्त्रिपरिषद्ले बिहीबार सम्झौतालाई अनुमोदन गर्ने भनिएको थियो । यसले गाजामा १५ महिना लामो युद्ध अन्त्य गर्ने र ठुलो सङ्ख्यामा बन्धकहरूलाई रिहा गर्ने मार्ग प्रशस्त गर्ने आशा गरिएको थियो । सम्झौताको घोषणापछि ठुलो सङ्ख्यामा प्यालेस्टिनीहरू सडकमा उत्रिएर उत्सव मनाएका थिए ।