६ माघ, काठमाडौं ।  नेपाल प्रहरीका पूर्व डीआईजी छविलाल जोशीलाई जिल्ला अदालत काठमाडौंले हिरासतमा राख्न आदेश दिएको छ। 

आइतबार आफैं अदालत हाजिर भएका जोशीको बयान नसकिएपछि उनलाई आज हिरासतमा राख्न आदेश भएको हो । उनको बयान सकिएपछि थुनछेक बहस सुरु हुनेछ ।

स्वर्णलक्ष्मी सहकारी को रकम अपचलन गरेको आरोपमा उनीविरुद्ध काठमाडौँ जिल्ला अदालतमा मुद्दा दायर भएको थियो ।

स्वर्णलक्ष्मी सहकारी ठगी प्रकरणमा ३९ जनालाई प्रतिवादी बनाउँदै मुद्दा दायर भएको थियो । यो सहकारीले ६९० बचतकर्ताको एक अर्ब १९ करोड ३० लाख ९० हजार ४९३ रुपैयाँ हिनामिना गरेको आरोप छ ।

सो प्रकरणमा रास्वपाका सभापति तथा पूर्व गृहमन्त्री रवि लामिछाने गत साता नै अदालतमा हाजिर भएका थिए । उनी ६० लाख धरौटी तिरेर छुटिसकेका छन् ।