७ माघ, काठमाडौं ।  चितवनमा युवकलाई निर्घात कुटपिट गरेका प्रहरी निलम्बनमा परेका छन् ।

असई बुद्धिबहादुर भुजेल निलम्बनमा परेका छन् । अहिले चितवन प्रहरीले बुलेट मोटरसाइकलको अनावश्यक आवाज नियन्त्रण अभियान पनि चलाइरहेको छ । उक्त घटना पुस १५ गते रातिको हो । भरतपुरको वडा नम्बर ११ को गणेशस्थान अस्थायी प्रहरी पोष्टका प्रसनि ड्यूटीमा रहेका थिए ।

राति करिब सवा १० बजेतिर एक स्कुटरसहित ४ वटा मोटरसाइकलमा युवाहरू हुइँकिँदै आए । सो क्रममा ध्वनि प्रदूषण गराउने मोटरसाइकल पनि युवाहरूले चढेर आएको प्रहरीको दाबी छ ।५–७ जनामध्ये सबैले मादक पदार्थ सेवन गरेर आएकाले उनीहरू भागेको प्रहरीको भनाइ छ ।

ती युवाले मोटरसाइकल छुटाउन आफूभन्दा माथिल्लो तहकालाई फोन गर्न लागेपछि ड्यूटीमा रहेका प्रसनि भुजेलले लात्तीले युवकलाई कुटेको देखिएको छ । सो रात चारवटै मोटरसाइकललाई ट्राफिक जरिवानापछि भोलिपल्ट दिउँसो छोडिएको थियो ।

कुटाइको विषय भने भिडिओ सार्वजनिक भएपछि थाहा भएको प्रहरीले जनाएको छ । सामाजिक सञ्जालमा भिडिओ भाइरल बनेपछि प्रहरीले अनुसन्धान सुरू गरेको थियो।