८ माघ, काठमाडौं । सुनसरीको धरान उपमहानगरपालिका–१५ मा खुकुरी प्रहार गरी एक युवकको हत्या भएको छ ।

धरान सदन रोडका २१ वर्षीय रिजन राईको चिया खाएको पैसा तिर्ने विषयमा विवाद हुँदा आफ्नै साथीहरूले खुकुरी प्रहार गरी हत्या गरेका हुन् ।

रिजनको टाउको, बायाँ कुम, हातको हत्केला र कुहिनामा चोट लागेको अवस्थामा प्रहरीले उद्धार गरी उपचारका लागि बीपी कोइराला स्वास्थ्य विज्ञान प्रतिष्ठान धरान पुर्‍याएको थियो । तर, गम्भीर घाइते रिजनको उपचारकै क्रममा मृत्यु भयो । घटनामा संलग्न पाँच जनालाई प्रहरीले पक्राउ गरेको छ ।