१७ माघ, काठमाडौं । पछिल्लो एक वर्षमा स्थायी बसोबास गर्ने उद्देश्यले ६६ हजार ८३१ जना नेपाली विदेश गएका छन् ।

अध्यागमन विभागले विदेश जाने क्रममा निकालेको तथ्यांक अनुसार यस्तो देखिएको हो। यस आधारमा स्थायी बसाइँँसराइ गरेर, अस्थायी बसोबासका लागि तथा पारिवारिक भेटघाटको लागि विदेश जाने नेपालीको संख्या बढी देखिन थालेको छ ।

सन् २०२४ मा अस्थायी बसोबासको लागि एक लाख ८२७ जना विदेश गएको अध्यागमन विभागको तथ्यांकले देखाएको छ। त्यस्तै पारिवारिक भेटघाटको लागि भन्दै एक लाख ३१ हजार ७८५ जना विदेश गएको देखिन्छ । डिपेन्डेन्टमा ३३ हजार ९०८ जना गएको तथ्यांकले देखाएको छ ।

राष्ट्रिय जनगणना २०७८ ले २१ लाख ९० हजार पाँच सय ९२ जना नेपाली विदेशमा रहेको देखाएको छ । यसमध्ये १५ लाख ५५ हजार नौ सय ६१ परिवारका १७ लाख ९९ हजार नौ सय ७५ जना पुरूष र तीन लाख ९० हजार नौ सय १७ जना महिला छन् ।

घरपरिवार सर्वेक्षणका क्रममा प्रायः कहाँ बसाइँ छ भन्ने आधारमा यस्तो तथ्यांक निकालिएको हो।