१७ माघ, काठमाडौं ।  प्रयागराजमा जारी महाकुम्भ मेलामा एक महिलाले २७ वर्षअघि हराएका आफ्ना श्रीमान फेला परेको बताएकी छन् ।

उनी झारखण्डकी धन्वा देवी हुन् । सन् १९९८ मा उनका श्रीमान् अचानक बेपत्ता भएका थिए । परिवारले उनलाई खोज्न हरसम्भव प्रयास गरे पनि फेला पार्न सकेको थिएन । तर, २७ वर्षपछि महाकुम्भ मेलामा उनले आफ्ना हराएका श्रीमान फेला पारेको बताएकी छन् । जसले सबैलाई चकित बनाएको छ । 

लाखौं भक्तजन र सन्तहरूको जमघट भएको प्रयागराजको महाकुम्भ मेलामा महिलाले अघोरी साधुलाई देखेकी थिइन्, जसको रूप अलिकति आफ्नो पतिजस्तो देखिन्थ्यो । शुरूमा उनले यो हो की होइन भन्ने ठानिन् ।

तर जब उनले नजिक आएर साधुको आँखामा हेरिन् उनी श्रीमान् गंगासागर यादव नै हुन् भन्ने विश्वस्त भइन् । अहिले यो भिडियोसमेत सामाजिक सञ्जालमा भाइरल भैरहेको छ । गंगासागर यादव अहिले राजकुमार बाबा भनेर चिनिन्छन् ।