१९ माघ, काठमाडौं ।  क्रान्तिकारी कम्युनिस्ट पार्टीले ताप्लेजुङ पाथीभराको मुक्कुमलुङ बचाउ आन्दोलनको क्रममा गोली चलाउने आदेश दिनेमाथि गृह प्रशासकमाथि सख्त कारबाही गर्न माग गरेको छ ।

पार्टीले सम्पूर्ण घाइते जनताको निःशुल्क उपचार गर्न सरकारसँग माग पनि गरेको छ ।कार्यवाहक महासचिव गौरवले विज्ञप्ति जारी गर्दै  गोलीकाण्डको घोर विरोध तथा तीव्र भर्त्सना गरेका छन् ।

विज्ञप्तिमा भनिएको छ, ‘ केबलकार निर्माणसँग सम्बन्धित यो आन्दोलन जनताको आस्था, संस्कृति, संस्कार र भावनासँग जोडिएको हुनाले बल प्रयोग गरेर यसको समाधान हुन सक्दैन । सीमित दलाल पुँजीपतिको पक्षमा उभिएर होइन स्थानीय जनतासँग बसेर आपसी सहमतिका आधारमा यस समस्याको समाधान खोज्न हाम्रो पार्टी सरकारसँग विशेष माग गर्दछ ।’

गत माघ १२ गते नेपाल सरकारको गृह प्रशासनले अन्धाधुन्ध गोली प्रहार गर्दा घाइते भएका मिक्लाजुङ–५, सिक्तेम्बा निवासी १८ वर्षीय सगुन लावतीको टिचिङ अस्पताल, महाराजगन्जको सघन उपचार कक्षामा उपचार भइरहेको छ ।