२४ माघ, काठमाडौं । प्रतिनिधिसभाको आजको बैठकको शून्य समयमा सांसदहरूले दैलेखमा पेट्रोलियम पदार्थ अन्वेषणलाई तीव्रता दिन सुझाव दिएका छन ।

बैठकमा सांसदहरूले नेपाल विद्युत प्राधिकरणको शेयर वितरण गर्नेदेखि सकल, भूमिहीन सुकुम्बासी, जातीय भेद्भाव, तटबन्धनआदि विषयमा पनि सभामुखमार्फत सरकारको ध्यानाकर्षण गराएका छन् । बैठकमा नेकपा (एकीकृत समाजवादी) का सांसद अम्मरबहादुर थापाले दैलेखमा जारी पेट्रेलियम पदार्थको अन्वेषणको दोस्रो चरणको काम सुरु भएको र तेस्रो चरणको कामलाई सरकारले तीव्रताका साथ अगाडि बढाउन माग गरे । दैलेखको भैरवी गाउँपालिका-१ जलजले क्षेत्रमा पेट्रोलियम पदार्थ र प्राकृतिक ग्यास अन्वेषणका लागि ड्रिलिङ काम भइरहेको छ ।

एमाले सांसद अमरबहादुर रायमाझीले उदयपुरको कटारी नगरपालिका– १४ घुर्मीस्थित सुनकोशी खानेपानी आयोजना गत असोजको बाडीबाट मुहान र पाइपलाइन ध्वस्त भएको जनाउँदै नगरपालिकाका अन्य स्थानमा पनि बाढीले अलपत्र पारेका आयोजनाको चाँडो निर्माण सम्पन्न गर्न सभामुखमार्फत सरकारको ध्यानाकर्षण गराए ।

एमालेकै अमृतादेवी अग्रहरिले सीमा नाकामा साना व्यापारीमाथि राजस्व विभागका कर्मचारीले अन्याय गरिरहेको जनाउँदै सम्बन्धित निकायको ध्यानाकर्षण गराइन ।

सांसद आश्माकुमारी चौधरीले भूमिहीन सुकुम्बासी तथा अव्यवस्थित बसोबासीको समस्या समाधान गर्न सरकारको ध्यानाकर्षण गराइन । स्वतन्त्र सांसद अमरेशकुमार सिंहले बागमती नदीबाट सर्लाहीको बरहथवा नगरपालिकाका १, २ र ३ तथा १३, १४ र १५ वडा हरेक वर्ष कटानले नागरिकलाई घरबारविहीन बनाएको भन्दै नदीकटान रोक्ने दीर्घकालीन व्यवस्थापन गर्न सरकारको ध्यानाकर्षण गराइन ।

कांग्रेस सांसद अर्जुननरसिंह केसीले नेपाल विद्युत प्राधिकरण ऐन बमोजिम सर्वसाधरणलाई शेयर जारी गर्नुपर्ने भए पनि हालसम्म त्यसो हुन नसकेको भन्दै तत्काल कानुन अनुसार २० प्रतिशत शेयर वितरण गर्न ध्यानाकर्षण गराए ।

कांग्रेसकै उदयशमशेर राणाले गत असोजको बाढीले ललितपुरका विभिन्न क्षेत्रका नागरिक प्रभावित भएको र चार महिनाको अवधिमासमेत उद्धार र पुनर्निर्माणको कामले गति लिन नसकेको भन्दै सभामुखमार्फत सरकारको ध्यानाकर्षण गराए ।

राष्ट्रिय स्वतन्त्र पार्टी (रास्वपा) का सांसद अशोककुमार चौधरीले ताप्लेजुङको पाथीभरामा केबलकार निर्माणका नाममा जनतालाई दुःख दिने काम तत्काल बन्द गर्न र संवाद र सहमतिका आधारमा समस्या समाधान गर्न सम्बन्धित निकायको ध्यानाकर्षण गराए ।

रास्वपाकै अषिम साहले आफ्ना पार्टी सभापति रवि लामिछानेलाई राजनीतिक प्रतिशोध साँधेर जिल्ला जिल्ला घुमाइरहेको र उनको सांसद पद निलम्बन गरिनु खेदजनक कार्य भएको भन्दै तत्काल निलम्बित सांसद पद फुकुवा गर्न माग गरे ।

सांसदहरु ईश्वरी न्यौपाने, उर्मिला थेवे, ऋषिकेश पोखरेल, एकनाथ ढकाल, कल्पना मियाँ कुसारी, किरणकुमार साह, गङ्गाप्रसाद यादव, चन्दा कार्की (भण्डारी), चन्द्रबहादुर विश्वकर्मा, चित्रबहादुर केसी, छविलाल विश्वकर्मा, छिरिङ डम्डुल लामा, छिरिङ ल्हामु लामा (तामाङ), जावेदा खातुन जागा, ज्वालाकुमारी साह, जीवन परियार, कान्तिका सेजुवाललगायतले समसामयिक विषयमा सरकारको ध्यानाकर्षण गराएका थिए ।