१३ फागुन, काठमाडौं ।  नेपाली काँग्रेसका नेता डा. शशांक कोइरालाले पार्टी सभापति शेरबहादुर देउवा आफू प्रधानमन्त्री भएपछि मात्रै १५ औँ महाधिवेशन गराउने पक्षमा रहेको दाबी गरेका छन् ।

महेन्द्रनारायण निधिको १०४ औँ जन्म जयन्तीका अवसरमा जनकपुरमा आयोजित कार्यक्रमलाई सम्बोधन गर्दै देउवासँग बुझ्दा प्रधानमन्त्री भएपछि ०८४ को चुनाव गराएपछि मात्रै महाधिवेशन गराउने मनसाय पाएको बताए ।

उनले भने, ‘अब पार्टीको अधिवेशन कहिले हुन्छ भन्ने सबैको मनमनमा होला। अधिवेशनको बारेमा मैले शेरबहादुरजीलाई सोधे । उहाँलाई सोध्नुभन्दा पहिला मैले एउटा अन्तर्वार्तामा मैले चुनावभन्दा दुई वर्ष पहिला अधिवेशन गराए राम्रो हो ।

तर, त्यसपछि गरायौँ भने हामी अफ्ठेरोमा पर्छौँ। चुनावमा मुखमा अधिवेशन गरायौँ भनेर राम्रो हुँदैन । त्यसैले दुई बर्ष पहिलो गरायो भने भनेको ०८२ सालमा गरायो भने हो नभए ०८४को चुनावपछि गराउनुपर्छ । शेरबहादुरजीलाई मैले सोध्दा उहाँले दोस्रो विकल्प समात्नुभयो। उहाँको मनोविज्ञान के छ भने पहिला म प्रधानमन्त्री भइहालूँ, अनि अधिवेशन गराऊँ भन्नेमा देखिन्छ ।’