१५ चैत, काठमाडौं । समाजवादी मोर्चा र राजवादीहरूको प्रदर्शनका कारण काठमाडौंको सवारी व्यवस्थापन अस्तव्यस्त भएको छ ।

राजावादीहरूले तीनकुने र गणतन्त्रवादीहरूले भृकुटीमण्डपको सडकमा प्रदर्शन गरिरहेकाले उपत्यकाभरको ट्राफिक व्यवस्थापन अस्तव्यस्त भएको हो । सकेसम्म दुई पक्षबीच भेट हुन नदिन सचेत रहेको सरकारले सडकमा व्यापकमात्रामा ट्राफिक प्रहरी र सुरक्षाकर्मी खटाएर डाइभर्सन गरिरहेको छ ।
काठमाडौंका नयाँबानेश्वर, माइतीघर, तीनकुने र दरबारमार्गसहितका मुख्य सडक क्षेत्रमा डाइभर्सन गरेर प्रवेश निषेध तथा एकतर्फी बनाइएको छ । जसकारण नियमित र अन्य कामले बाहिर निस्किएका सर्वसाधारणलाई ठूलो सास्ती भएको छ ।