२० चैत, काठमाडौं । सरकारी सेवामा आवद्ध नर्सहरूको संघ (गोनान) ले आफ्नो स्थापना दिवसको अवसरमा काठमाडौं उपत्यकाका सरकारी अस्पतालहरूमा कार्यरत नर्सको पाठेघरको मुखको क्यान्सरको जाँच गरिएको छ ।

नर्सहरूको स्वास्थ्य र सुरक्षा सबैको सरोकार, गुणस्तरीय नर्सिङ सेवा जनताको अधिकार भन्ने मुल नाराका साथ भक्तपुर क्यान्सर अस्पतालको सहकार्यमा सोमबार वीर अस्पतालमा शिविर आयोजना गरिएको थियो । उक्त शिविरमा २ सय ५६ जना नर्सले परीक्षण गरिएको गोनानकी अध्यक्ष कल्पना श्रेष्ठले जानकारी दिइन । उनका अनुसार सरकारी अस्पतालमा कार्यरत ३० वर्षभन्दा माथिका विवाहित नर्सहरूले पाठेघरको मुखको क्यान्सरको जाँच गराएका थिए । वीर अस्पताल, कान्ती बाल अस्पताल, मानसिक अस्पताल पाटन, प्रसूति गृह, नरदेवी आयुर्वेद अस्पताल, टेकु अस्पताल, भक्तपुर क्यान्सर अस्पताल, निजामती कर्मचारी अस्पतालमा कार्यरत नर्सको जाँच गरिएको थियो । चार वर्ष अगाडि सरकारी सेवामा कार्यरत नर्सहरूको हक हितका लागि भन्दै संघको स्थापना भएको थियो । उनका अनुसार परीक्षणको रिर्पोट आउन केही दिन लाग्नेछ ।

चिकित्सकका अनुसार नेपालमा महिलाको मृत्यु हुने प्रमुख कारणमध्ये पाठेघरको क्यान्सर एक हो । पाठेघरको मुखको क्यान्सर हुने मुख्य भूमिका ह्युमन प्यापिलोमा भाइरस (एचपीभी) को कारण हुन्छ । विश्व स्वास्थ्य संगठन (डब्लूएचओ)को तथ्यांक अनुसार नेपालमा एक लाख महिलामध्ये १४ जनाभन्दा बढीलाई पाठेघर मुखको क्यान्सर हुन्छ । वार्षिक २ हजारको मृत्यु हुने गरेको छ ।