२० चैत, काठमाडौं । संसद्‌को राज्य व्यवस्था तथा सुशासन समितिमा सांसदहरूले तीनकुने घटनाबारे गृहमन्त्रीले जवाफ दिनुपर्ने माग राखेका छन् ।

आज समितिको बैठकमा सांसदहरूले तीनकुने घटनाबारे सरकारको तर्फबाट जवाफ आउनुपर्ने बताएका हुन । बैठकमा नेपाली कांग्रेसका सांसद हृदयराम थानीले प्रधानमन्त्री विदेश भ्रमणमा रहेकाले गृहमन्त्रीले जवाफ दिनुपर्ने माग राखे । उनले भने,‘चैत १५ गतेको घटनाक्रममा गृहमन्त्री बोलाऔँ । प्रधानमन्त्रीजी नै बोलाउनुपर्ने हो, उहाँ उता जानुभएको छ । गृहमन्त्रीजीलाई सोध्ने व्यवस्था मिलाऊँ ।’

कांग्रेस सांसद सरिता प्रसाईंले पनि तीनकुने घटनाबारे गृहमन्त्रीलाई बोलाउनुपर्ने माग राखिन । कांग्रेस महामन्त्रीसमेत रहेका सांसद विश्वप्रकाश शर्माले पनि तीनकुने घटनाबारे राज्यको बुझाइ सार्वजनिक गर्नुपर्ने धारणा राखे । नेकपा (एमाले)का सांसद राजेन्द्र कुमार राईले पनि गृहमन्त्रीले जवाफ दिनुपर्ने बताए । चैत १५ गते काठमाडौंको तीनकुनेमा राजावादीको प्रदर्शनले उग्ररूप लिएपछि दुई जनाको ज्यान गएको थियो । प्रदर्शनका क्रममा आगजनी तथा तोडफोडसमेत गरिएको थियो ।