२० चैत्र, काठमाडौं । राष्ट्रिय प्रजातन्त्र पार्टी (राप्रपा)का सांसद बुद्धिमान तामाङले तीनकुने घटनाको निष्पक्ष छानबिन गर्न माग गरेका छन् ।

बुधबार संसद्‌को राज्य व्यवस्था तथा सुशासन समितिको बैठकमा सांसद तामाङले घटनाको निष्पक्ष छानबिन गर्न माग गरेका हुन् । तामाङले आफूहरू पनि प्रदर्शनमा सहभागी हुन खोजेको तर मञ्चमा दुर्गा प्रसाईंको फोटो देखेपछि नगएको पनि खुलाए ।

‘हाम्रो पार्टीको अध्यक्ष राजेन्द्र लिङ्देनज्यू, ज्ञानेद्र शाहीसहित हाम्रो ग्रुप नै थियो । हामी प्रदर्शनमा जाने कुरा भइरहेको थियो । तर, मञ्चतिर हेर्दा त राजाको फोटो, अनि त्यही साइजको दुर्गा प्रसाईंको फोटो राखेको देखियो । ओहो, खत्तम रहेछ भन्ने लाग्यो । हामी गएनौँ,’उनले भने ।उनले अगाडि भने, ‘आन्दोलनलाई समर्थन गर्ने भनेरमात्र हुँदो रहेनछ । हाम्रोबाट अध्यक्ष जानुभएन, धेरैजना जानुभएन । मैले पनि यसो हेरेको दुर्गा प्रसाईंको फोटो देखेपछि टाप कसिहालेँ नि । फोटो देखेर डर लागिहाल्यो नि ।’