२० चैत, काठमाडौं । मर्यादित रुपमा सहकारी सञ्चालनका लागि कानून निर्माण, नियमन, कार्यान्वयन तथा सहकारी शिक्षामा विज्ञहरुले जोड दिएका छन ।

आज ६८ औँ राष्ट्रिय सहकारी दिवस तथा अन्तर्राष्ट्रिय सहकारी वर्ष-२०२५ अवसरमा काठमाडौंमा आयोजित कार्यक्रममा उनीहरुले कानून कार्यान्वयन र सहकारीकर्मीहरु मर्यादित हुनुपर्ने बताएका हुन । सहकारी सञ्चालनमा शेयर धनी मर्यादित हुनुपर्ने उनीहरुको भनाइ छ । पूर्वमुख्यमन्त्री एवं नेकपा एमालेका सहकारी विभाग प्रमुख खगराज अधिकारीले सहकारी शेयर सदस्यहरुले आफूले सहकारीमा कति वचत राख्ने हो त्यसको सीमा तोक्नुपर्ने बताए । उनले सरकारले विधेयकमार्फत कानून निर्माण गरेको भएपनि त्यहाँ रहेका कतिपय अस्प्रष्ट कुराहरु सच्याउनुपर्ने बताए । 
उनले सहकारी खोलेर त्यसैमार्फत राजनीति गर्ने र ठगी गरेर अदालतसमेत भड्काउने गरेको आरोप लगाउँदै सहकारीकर्मी सच्चिनुपर्ने बताए ।

पूर्वमन्त्री एवं नेकपा (माओवादी केन्द्र)का सहकारी विभाग प्रमुख लिलामणि पोखरेलले नेपालको संविधानमा अर्थतन्त्रको तीन खम्बे नीति अन्तर्गत सहकारी एक खम्बा भएको व्यवस्था भएपनि व्यवहारमा उपेक्षा गरेको बताए । उनले नवउदार पुँजीवादी चिन्तन हावी भएका नीति निर्माताका कारण आवश्यक नीति निर्माण नबन्दा सहकारी बेवारिसे अवस्थामा पुगेको आरोप लगाए । उनले बैंकमा धेरै पैसा भएपनि नियमनका कारण कुनै समस्या नदेखिएको तर सहकारीमा कानून कार्यान्वयन र नियमन नहुँदा समस्याग्रस्त बनेको जिकिर गरे । संविधान निर्माण भएको दश वर्ष पुग्न लाग्दसमेत सहकारीसँग सम्बन्धित आवश्यक कानून निर्माणमा सरकारको ध्यान नगएको बताए ।

नेपाली काँग्रेसका सहकारी विभाग प्रमुख देवेन्द्रराज कँडेलले सहकारीको पैसा ठगी गर्नेले नै विचार र भावनाले सर्वसाधारणलाई भ्रमित पारेर समाजमा उनीहरुनै लोकप्रिय बनेको आरोप लगाए । उनले विगतमा सहकारीले गाउँ गाउँका दूरदराजमा पुगेर सदस्यहरुको आवश्यकता पूरा गर्ने गरेको तर अहिले सहकारीमा त्यो विचलन आएको बताए । उनले केही बद्मास सञ्चालकहरुले सहकारीताका नाममा ठगी गरेर पवित्र संस्था सहकारीको बद्नाम गरेको जिकिर गरे ।

कार्यक्रममा वक्ताहरुले सहकारीकर्मी बनेर राजनीति गर्ने पार्टी बनाउने अराजकता भड्काउने गालीगलौज गर्ने काम कसैले गर्न नुहुनेमा जोड दिएका थिए । उनीहरुले सहकारी शिक्षा लिएका सहकारीकर्मीहरुले सहकारीबारे सामाजिक सञ्जालमार्फत सकारात्मक प्रचार प्रसारका लागि महत्वपूर्ण भूमिका खेल्नुपर्ने बताएका थिए ।