२१  चैत्र, काठमाडौं ।  मोरङमा फोक्सो एवं श्वासप्रश्वाससम्बन्धी चिकित्सकले हड्डीको उपचार गर्न खोज्दा एक बिरामीको मृत्यु भएको छ ।

सुनसरी इनरुवाकी विमला थापा पोखरेल श्वासप्रश्वाससम्बन्धी समस्या भई अस्पताल गएर उपचारपछि निको भएकी थिइन् ।त्यसपछि डा.रामहरि घिमिरेले बिरामीको ढाडको दुखाइ पनि निको पारिदिन्छु भनी उपचार गर्दा बिरामीको मृत्यु भएको परिवारले आरोप लगाएको छ । बिरामीको मृत्यु भएपछि क्षतिपूर्ति मागसहित परिवार अदालत पुगेको छ । मृतकका श्रीमान् महेश्वर पोखरेलले मोरङ जिल्ला अदालतमा बुधबार फिरादपत्र दर्ता गरेका छन् ।

गत माघ १० गते सुनसरी इनरुवाकी विमला थापा पोखरेललाई सामान्य श्वासप्रश्वासको समस्या देखियो । सधैँ हिँडडुल गरिरहने फुर्तिलो स्वभावकी पोखरेल श्वासप्रश्वासमा समस्या देखिएपछि मोरङको विराटनगर महानगरपालिका–४ कञ्चनपुरस्थित नोबेल मेडिकल कलेज टिचिङ अस्पताल पुगिन् ।ओपीडीमा जाँच परीक्षणका लागि गएकी उनलाई अस्पतालले फोक्सोमा दीर्घकालीन अवरोधसम्बन्धी रोग सीओपीडी र रक्तअल्पताको समस्या देखिएको बतायो । चिकित्सकको सल्लाहबमोजिम भर्ना भई उनको उपचार प्रक्रिया सुरु भयो ।

विभिन्न परीक्षणपश्चात् फोक्सो तथा श्वासप्रश्वाससम्बन्धी विशेषज्ञ डाक्टर रामहरि घिमिरेको रेखदेखमा उनको उपचार भयो । एक साताको उपचारपछि घिमिरेले नै डिस्चार्ज गर्न परिवारलाई सुझाव दिए । श्रीमान् महेश्वरका अनुसार विमलाको ढाडमा २०–२५ वर्षदेखि सामान्य दुखाइको समस्या थियो । अर्थोपेडिक डाक्टरको सल्लाहबमोजिम औषधि सेवन गरिरहेकी थिइन् । डिस्चार्ज भइसकेकी विमलाको ढाड दुख्ने समस्या देखियो ।

विमलाले आफ्नो ढाडको समस्या सुनाइन् । त्यसपछि डाक्टर घिमिरेले हतार नगर्न बताउँदै एलबीपी (ढाडको तल्लो भागको दुखाइ ठीक हुने औषधि) लेखिदिन्छु भनेर सोही दिन ‘मोर्फिन’ नामक औषधि खान दिएका थिए । ‘डा.रामहरि घिमिरे र डा.रुपक केसीले ड्रग्स स्लिपमा सहीछापसमेत गरेर मोर्फिन सेवन गर्न लगाउनुभयो । मोर्फिन सेवनपश्चात् मेरी पत्नीलाई अत्यन्तै असहज भयो ।

ज्वरो आउने र श्वासप्रश्वासमा समस्या उत्पन्न भयो । वार्डमा कार्यरत नर्सलाई बताउँदा समेत बेवास्ता गर्नुभयो,’ फिरादपत्रमा भनिएको छ, ‘माघ २१ गते रातभरि मेरी पत्नी पीडामा छट्पटाइन्, बिहानपख बेहोस भइन् । मैले रोइकराई गरेपछि आईसीयूमा लगियो र अघिल्लो दिन डिस्चार्ज हुन लागेकी मेरी पत्नीलाई विपक्षी अस्पताल ले मृत घोषणा गरिदिए ।’मोर्फिन एक शक्तिशाली ओपीओइड एनाल्जेसिक (पेनकिलर) हो । यसको प्रयोग अत्यधिक दुखाइका वेला चिकित्सकको रेखदेखमा दिइन्छ ।

यद्यपि, श्वासप्रश्वासका बिरामी, एलर्जी, नशासम्बन्धी रोग, गम्भीर मिर्गौला र कलेजोका बिरामी र गर्भवती महिलालाई दिन नहुने चिकित्सकहरु बताउँछन् ।गलत औषधि दिई गम्भीर लापरबाही गरेका कारण आफ्नी पत्नीको मृत्यु भएको उनको आरोप छ । अस्पतालले उपलब्ध गराएको कागजात हेर्दा पनि चिकित्सकीय लापरबाहीका कारण आफ्नी पत्नीको मृत्यु भएको देखिएको उनले बताए ।

सम्बन्धित विशेषज्ञ डाक्टरको निरीक्षणविनै तीनपटक ५० एमजीका दरले १५० एमजी मोर्फिन औषधि सेवन गराइएको अस्पतालबाट जारी औषधि पत्रमा देखिन्छ ।उक्त विषयमा बुझ्न खोज्दा डाक्टरले गैरजिम्मेवार जवाफ दिएको दाबी पनि उनले गरेका छन्