२१  चैत्र, काठमाडौं ।  पुराना मागमा सरकारले बेवास्ता गरेको भन्दै शिक्षकहरू फेरि सडक आन्दोलनमा होमिएका छन् ।

एसईईको उत्तरपुस्तिका जाँच्नै छोडेर शिक्षकहरू राजधानीमा आन्दोलनमा उत्रिएका छन्। नेपाल शिक्षक महासंघको अगुवाइमा बुधबार माइतीघरमा देशैभरबाट करिब ४० हजार शिक्षक सडक आन्दोलनमा उत्रेका थिए । माध्यमिक शिक्षा परीक्षा (एसईई)को उत्तरपुस्तिका परीक्षण गर्ने बेलामा सरकारदेखि निजी विद्यालयका शिक्षकसमेत यतिबेला राजधानीमा आन्दोलित छन्।

शिक्षकहरु यसअघि सरकारले गरेको सम्झौता कार्यान्वयन नगरेसम्म २०८१ सालको एसईईमा सहभागी सामुदायिक र संस्थागत ५ लाख १४ हजार ७१ विद्यार्थीको उत्तरपुस्तिका समेत जाँच नगर्ने अडान राख्दै आन्दोलनमा होमिएका हुन् ।
यतिबेला शिक्षा विधेयक प्रतिनिधिसभामा पेस भई छलफलका क्रममा रहेकाले यसका कतिपय प्रावधानमा शिक्षकहरूको असहमति भएकाले आफ्ना माग पूरा गर्न आन्दोलित भएका हुन् ।

गत वर्ष सरकारसँग सहमति भएको सम्झौता कार्यान्वयन नभएपछि फेरि देशभरका शिक्षकहरू आन्दोलनमा उत्रन बाध्य भएको शिक्षकहरु बताउँछन् । यसअघि २०८० असोज ३ गते आन्दोलन भएको थियो।