२१ चैत, काठमाडौं । विगत केही दिनदेखि काठमाडौं उपत्यकामा वायु प्रदूषण बढेको छ ।

जसकारण काठमाडौं उपत्यकामा बसोबास गर्ने मानिसको आँखारनाक पोल्ने, टाउको दुख्ने, घाँटी दुख्ने, स्वासप्रश्वासमा समस्या देखिन थालेको छ । स्वास्थ्य मन्त्रालयले समेत अनावश्यक रुपमा बाहिर ननिस्कन र निस्कदा चस्मा र मास्क प्रयोग गर्न आग्रह गरेको छ । स्वास्थ्य मन्त्रालयका प्रवक्ता डा। प्रकाश बुढाथोकीले वायु प्रदूषणबाट बच्नका लागि सकेसम्म अनावश्यक यात्रा र बिहानी हिडाई नगर्न बाहिर यात्रा गर्नै परेमा अनिवार्य रूपमा मास्क लगाउन र अत्यधिक प्रदूषित क्षेत्रहरूबाट टाढा रहन सुझाव दिए ।

मौसम विभागले काठमाडौँ उपत्यकामा डम्म लागेको बादल फाट्न अझ केही दिन लाग्ने जनाएको छ । मौसमविद् बिनु महर्जनले शुक्रबारदेखि वायुको वेग अधिक हुने सम्भावना रहेकाले क्रमशः सुधार भई आकाश खुल्दै जाने बताइन्। उनले क्रमशः तापक्रम पनि बढ्ने बताइन् ।

आज बिहान पनि काठमाडौंको प्रदुषण खतरनाकको तह भन्दा माथि छ । प्रदुषण बढेसँगै दीर्घरोगी, गर्भवती महिला, बालबालिकाहरुमा बढी असर पर्ने भन्दै चिकित्सकहरुले घरभित्रै बस्न आग्रह गरेका छन् । चिकित्सकहरुले आवश्यक काम बाहेक घर बाहिर ननिस्कन पनि आग्रह गरेका छन् ।