|  

ओली र मोदीबीच आज भेटवार्ता हुँदै

२२ चैत, काठमाडौं । थाइल्यान्ड भ्रमणमा रहेका प्रधानमन्त्री केपी शर्मा ओली र भारतीय समकक्षी नरेन्द्र मोदीबीच भेटवार्ता हुने भएको छ ।

नेपाली समयअनुसार आज अपरान्ह् ४ बजे हुने परराष्ट्र मन्त्रालयले जानकारी दिएको छ । परराष्ट्र मन्त्रालयका एक अधिकारीका अनुसार बहुक्षेत्रीय प्राविधिक तथा आर्थिक सहयोगका लागि बंगाल खाडीको प्रयास (बिमस्टेक) को छैटौं सम्मेलनका अवसरमा ओली र मोदीबीच ‘साइडलाइन वार्ता’ हुने निश्चित भएकोे हो । ती अधिकारीले भने, ‘डेढदेखि तीन घण्टाको समय भारतीय प्रधानमन्त्रीको समय खाली छ । त्यही समयमा नेपालबाट परराष्ट्र मन्त्रीजीले समय मिलाउनुभएको छ । लामो भेट र धेरै विषयमा छलफल नहुन सक्छ । भेट भने तय भइसक्यो ।’

लामो समयदेखि परराष्ट्र मन्त्री डा.आरजु राणा देउवाले भारतीय समकक्षी एस जयशंकरसँग ओली र मोदीबीच भेटवार्ताका लागि विशेष पहल गरेकी थिइन । परराष्ट्रमन्त्री राणाकै पहलमा दुई देशका प्रधानमन्त्रीबीच आज भेट हुने भएको हो । भारतीय प्रधानमन्त्री थाइल्यान्डबाटै श्रीलंका भ्रमणमा जाँदै छन् ।