२२ चैत, काठमाडौं । पूर्व उपप्रधानमन्त्री डा.भीम रावलले राज्य सञ्चालनमा संलग्न रहेका व्यक्तिहरुले तीनकुनेको हिंसात्मक घटनालाई गम्भीर रूपले लिनुपर्ने बताएका छन ।

आज पत्रकारसँग कुरा गर्दै उनले उक्त हिंसात्मक घटनाको दोषी को हो भन्ने कुरा निष्पक्ष छानविन गर्नका लागि न्यायिक छानविन आयोग बन्नुपर्ने बताएका हुन । उनले उक्त घटनाको न्यायिक छानविन भएर सत्यतथ्य बाहिर आएपछि मात्रै भोलिका दिनमा राज्यप्रति नागरिकहरुको विश्वासनीयता कायम हुने बताए । उनले भनेका छन्, ‘यदि यस्तो कुरालाई एकदम अन्यौलग्रस्त राख्न दिइयो भने यसको पछि धेरै नकरात्मक प्रभावहरु पर्न सक्छन् । त्यसकारण यसको उच्चस्तरीय, निश्पक्ष, न्यायिक छानविन हुनुपर्छ ।’ 

नेता रावलले अहिले देशको राजनीति संविधानलाई मिचेर सिद्धान्तहीन, उद्देश्यहीन र गन्तव्यहीन यात्रामा अगाडि बढिरहेको पनि बताए । अहिलेका प्रधानमन्त्री केपी शर्मा अ‍ोली र दलका शीर्ष नेताहरुले लोकतन्त्रको मूल्य, मान्यतालाई कुल्चिएको र संविधान नमानेको उनको आरोप छ । तीन कुनेको हिंसा भड्काउनमा राजनीतिक दल नै जिम्मेवार रहेको उनको आरोप छ ।