२३ चैत, काठमाडौं । गत चैत १५ मा पक्राउ परेकाको रिहाइका लागि राष्ट्रिय प्रजातन्त्र पार्टी (राप्रपा) ले चरणवद्ध आन्दोलन गर्ने भएको छ ।

राप्रपाका प्रवक्ता मोहन श्रेष्ठका अनुसार २६ चैतमा काठमाडौँमा बागमती प्रदेश स्तरीय शक्ति प्रदर्शन गर्ने र अन्य विविध कार्यक्रम समेत गर्ने छ । पक्राउ परेकाको रिहाका लागि अहिले पनि राप्रपा आन्दोलित छ । पक्राउ परेलगत्तै २४ घण्टे समय दिएर राप्रपाले देशभर मसाल जुलुस निकालेको थियो । त्यसपछि माइतीघर मण्डलमा प्रदर्शन गरेको राप्रपाका अध्यक्ष राजेन्द्र लिङदेनले कार्यबाहक प्रधानमन्त्री प्रकाशमान सिंहलाई हिजाे ज्ञापनपत्र बुझाएका छन । तीनकुने प्रदर्शन हिंसात्मक बन्नुमा सरकार जिम्मेवार रहेको निष्कर्षसहित राप्रपाले गृहमन्त्री रमेश लेखकको राजीनामा मागिरहेको छ । गृहमन्त्री रमेश लेखकको राजीनामा, सम्बन्धित प्रहरी र प्रशासनिक नेतृत्वका अधिकारीहरुको निलम्बन लगायत माग राखेर राप्रपाले २६ चैतमा शक्ति प्रदर्शनको तयारी गरेको छ ।