२३ चैत्र, काठमाडौं ।  प्रधानमन्त्री केपी शर्मा ओलीले आन्दोलनरत शिक्षकहरूको कुरा सरकारले सुन्ने भन्दै धेरै दुःख नगर्न आग्रह गरेका छन् ।

थाइल्यान्डको औपचारिक भ्रमण सकेर शनिबार स्वदेश फर्किएका प्रधानमन्त्री ओलीले त्रिभुवन अन्तर्राष्ट्रिय विमास्थलमा सञ्चारकर्मीसँग कुराकानी गर्दै यस्तो आग्रह गरेका हुन् ।

‘हामी कुराकानी पनि गर्छौं, सरकारले उहाँहरूको कुरा सुन्छ पनि । न सरकार उहाँहरूको विरोधी हो, न उहाँहरू सरकारको विरोधी हो । यो सबै हामी एउटै हौं,’ प्रधानमन्त्री ओलीले भने, ‘के कति गर्न सकिन्छ भन्ने कुरा परस्परमा कुरा गरेर टुंगिने हो । धेरै उहाँहरूले पनि दुःख नपाए हुन्छ ।’

देशभरका शिक्षकहरू केही दिनदेखि विद्यालय शिक्षा ऐन जारी हुनुपर्ने मागसहित प्रदर्शनमा छन् । शनिबार पनि उनीहरू नयाँ बानेश्वरदेखि माइतीघर मण्डलासम्मको क्षेत्रमा प्रदर्शन गरिरहेका छन् ।