२३ चैत्र, काठमाडौं ।  शुक्रबार जाजरकोट केन्द्रविन्दु भएर गएको भूकम्पमा परेर ८ जना घाइते भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार जाजरकोटमा ६ र रुकुम पश्चिममा २ जना घाइते भएका हुन् । भूकम्पमा परी घाइते भएकामध्ये जाजरकोटमा ३ जना उपचारपश्चात् डिस्चार्ज भएको, जाजरकोटका ३ तथा रुकुम पश्चिमका २  गरी ५ जनाको उपचार चलिरहेको छ।

उपचाररत ५ जनामध्ये ४ जनाको अवस्था सामान्य र १ जनाको अवस्था मध्यम रहेको छ ।भूकम्पका कारण जाजरकोट, रुकुम पश्चिम र कालीकोट जिल्लाका केही निजी आवास तथा सरकारी भवन सामान्य चर्किएका छन् ।  
शुक्रबार राति ८ः ७ बजे र लगत्तै ८ः१० बजे जाजरकोटको कुशे गाउँपालिका–९, पैंक केन्द्रविन्दु बनाएर क्रमशः ५.२ म्याग्निच्यूड र ५.५ म्याग्निच्यूडका दुईवटा भूकम्प गएको थियो ।