११ बैशाख, काठमाडौं । काठमाडौँ महानगरपालिकाकी उपप्रमुख सुनिता डङ्गोलले सामाजिक सञ्जालमा स्टन्ट गरेर देश नबन्ने भन्दै बालेनप्रति कटाक्ष गरेकी छन् ।

बिहीबार काठमाडौँको भृकुटी मण्डपमा एमालेले आयोजना गरेको ‘युथ सेलिब्रेशन’ कार्यक्रममा बोल्दै डङ्गोलले सामाजिक सञ्जालमा स्टन्ट गरेर देश नबन्ने भन्दै एमालेले सोसल मिडियामा भाँडभैलो गरेर उग्र बन्न नसिकाउने बताएकी हुन् । 

उनले भनिन्- ‘एमालेले कसैको घर जलाउन सिकाउँदैन । लुटपाट गर्न युवा प्रयोग गर्दैन र राष्ट्रको काम गर्न प्रेरित गरिरहन्छ । सोसल मिडियामा भाँडभैलो गरेर उग्र बन्न एमालेले सिकाउँदैन ।’

साथै कार्यक्रममा डंगोलले एमालेबाट उपमेयरमा चुनाव लड्दै गर्दा बेकारमा पार्टीमा गएर जीवन बिगारेको र भ्रम छर्दै भड्काउने प्रयास भएको बताइन् । उनले आफुले जवाफमा उनले इतिहास बुझेको र अध्ययन गरेको भन्दै एमालेले सरकारमा गएका बेला राष्ट्र विकास गरेको भन्दै आफू एमालेमै लाग्ने निर्णय गरेको बताइन् । 

उनले भनिन्- 'उमेरले मात्र युवा हुँदोरहेनछ । हामी निरन्तर अध्ययनशील हुन्छौ र सत्यका पछि उभिइरहनेछौ । जब म नेकपा एमालेमा आबद्ध हुने निर्णय गरेँ धेरैले मलाई निरुत्साहित पनि गर्नुभयो र यो पार्टीमा युवाको ठाउँ छैन । जीवन बिगार्‍यौ ।’

उनले आफु सधै जनताको बीचमा काम गरिरहेको भन्दै समस्याबाट भागेर होइन अगाडी आएर युवाहरुले समस्या समाधान गर्नुपर्ने बताइन् ।