२४ बैशाख, काठमाडाैं । नेपाली काँग्रेसका सांसद दीपक गिरीले गैरआवासीय नेपाली (एनआरएन) लाई संविधानअनुसारको अधिकार दिलाउने र नेपालमा लगानी गर्ने कानुनी सुविधा सुनिश्चित गर्न सरकारसँग माग गरेका छन् ।

प्रतिनिधि सभाको आजको बैठकमा बोल्दै सांसद गिरीले गैरआवासीय नेपालीहरूलाई नेपालको विकासमा साझेदारको रूपमा हेर्नुपर्ने उल्लेख गर्दै उनीहरूलाई नेपाली नागरिक सरह व्यवहार गर्नुपर्ने बताए । उनले गैरआवासीय नेपाली नागरिकताको विषयमा कानूनी र कार्यान्वयन पक्षमा स्पष्टता नहुँदा लाखौं प्रवासी नेपालीले लगानी गर्ने अवसर गुमाइरहेको बताए । उनले भने, ‘गैरआवासीय नेपाली (एनआरएन)हरु नेपालको विकासका साझेदार हुन् । त्यसैले संविधानले नै व्यवस्था गरेको सबै अधिकार पाउने गरी एनआएन नागरिकताको कार्यान्वयन गर्न र नेपाली नागरिक सरह एनआरएनलाई पनि नेपालमा लगानी गर्ने कानूनी व्यवस्था गर्न म सरकारसँग जोडदार माग गर्दछु ।’

सरकारले एनआरएन नागरिकताका सम्बन्धमा केही प्रक्रिया अघि बढाए पनि पूर्ण कार्यान्वयन र व्यावसायिक हक-अधिकारको सुनिश्चितता अझै गर्न सकेको छैन ।